Inā te maha o ngā painga o ngā ngahere taketake mai i te kanorau koioratanga, ki te tiaki i te oneone, ki te tiaki i te mauri o te wai. Ka āwhina hoki te rākau paina i tēnei mahi.
Ka mahi tahi ngā rākau taketake me ngā rākau rāwaho ki te tiaki i te whenua, ki te waihanga hoki i te kanorau koiora. Ka whakahaumaru hoki i te whenua mai i ngā pānga kino o te āhuarangi hurihuri.
He whakaaro pai pea kia whakatipuria ngā rākau taketake me ngā rākau rāwaho i tō ngahere.
Anei ētahi ara e āwhina ai te rākau paina i ngā rākau taketake, i te taiao hoki.
I ngā tau 3-5 whai muri i te whakatōnga, ka noho whakaraerae ngā māhuri taketake. Ka whakahaumaru te paina i ngā rākau taketake nā tōna tere tipu, nā tōna kaha hoki ki te kaupare i ngā huarere kino. Ko tā te rākau paina he whakarite korowai whakahaumaru i ngā māhuri taketake e tipu ana i raro iho.
I ngā ngahere paina, mehemea e tika ana te wehewehe o ngā rākau, ka tipu ngā rākau taketake i waenganui i ngā paina. Ina tipu ai ngā rākau taketake, ka rapuhia te aho i raro i te korowai whakahaumaru o ngā paina. Mehemea kāore e tika te wehewehe o ngā paina, me whakatuwhera pea i te kāuru o te ngahere kia uru mai ai te aho.
He pānga tō te āhuarangi o waho o te ngahere ki te āhuarangi iti o roto. Mehemea ka whakatōkia he paina i te taha o ngā ngahere taketake iti, mā ngā paina rā e whakarite tauārai āhuarangi iti. Mā konā e whakahaumaru ai ngā mahuetanga rākau taketake mai i ngā panonitanga aho, panonitanga hau hoki.
Mā te marumaru a te paina e tiaki ai te rākau taketake, inārā ngā māhuri whakaraerae. Ko tā taua marumaru he waihanga i te taiao mātao e tipu pai ai te rākau taketake.
Mātakihia tā Tākuta Adam Forbes ataata mō te āhuarangi iti me tōna pānga ki te ngahere.
Mehemea e tika ana te wehewehe me te kokoti i te ngahere paina, ka noho ia hei kāinga mā ngā paparanga ururua taketake, ngā huru whenua, ngā rākau taketake hoki. Ka noho hoki hei nōhanga mā te aitanga a-pēpeke me ngā kīrehe. Mehemea he rerekē hoki te pakeke o ngā tūnga paina, mā konā e tautoko ai aua uaratanga, mā roto mai i te hurihanga hauhake.
Mehemea e tata ana te ngahere paina ki te ngahere taketake, mā ngā manu e hora ai ngā kākano mai i ngā rākau taketake ki te ngahere paina. Mā konā e tipu ai ngā pihinga i te paparanga o raro o te whakatipunga paina.
He wāhi nui tō te manu i te whakahora kākano, te tiaki hoki i te taiao. Mā ngā ngahere paina e tūhono ā-hauropi te horanuku whenua, he āwhina i te haereere o te manu.
He ngāwari ake te huri haere i ngā horanuku whenua ngahere, tae atu rā ki te ngahere paina mā te manu kai pepeke, pērā i te pīwakawaka me te riroriro. He uaua ake mā aua manu ngā horanuku whenua nui e wātea ana.
Mā ngā paina tawhito e uhi ngā huanga kai mātāmuri me ngā kai pērā i te ginseng, te mīere, te kōura hoki.
Mā ngā rākau paina e tuku kōwhiringa mō ngā mahi ka taea e te whenua hei painga mā te whānau. Ko ētahi whenua ka whakamahia hei pāmu, heoi, ki ngā whenua kāore e pai mō te mahi pāmu, ka whakatipuria he paina hei papa rākau, hei whiwhinga waro hoki.
Mā te huhua o ngā mahi i tō whenua, ka hua mai pea ngā painga mā te whānau, tae atu ki te kai, te whiwhinga moni, te whai mahi hoki.
Tirohia ngā momo me ngā aratohu hei āwhina i a koutou ki te tīpako i ngā rākau hei whakatō.