Ngā ringa āwhina Practical support

He mōhiohio tō ngā pakihi o Aotearoa mō te whenua, ngā rākau, te whakatō tipu hoki hei tuku ki a koe. Mai i te kupu āwhina mō te momo kaupapa ngahere e tino tika ana mō te whenua, ki ngā momo rākau hei whakatō. Tirohia ko wai mā ngā ringa āwhina hei tautoko i tō kaupapa.

Tupu

Ka āwhina a Tupu i te whānau ki te tūhono, te urungi, te whakawhanake hoki i te whenua Māori. Mehemea koe e whakatau tonu ana ka ahatia tō whenua, mā Tupu e āwhina.

Mā te rauemi Rapua tō whenua a Tupu e tuku mōhiohio mō te whenua, tae atu ki tōna wāhi, tōna āhuarangi me ngā kōwhiringa whakamahinga.

Kōrero ki a Tupu mō:

  • te rapu i tō koutou whenua
  • ngā kōwhiringa whenua
  • ngā tūnga me ngā hanganga mana urungi mō te whenua
  • ngā mahere whakawhanake pakihi.

Whenua Oho

Ko tā Whenua Oho mahi he tautoko i ngā kaitiaki whenua Māori kia kitea ngā whakamahinga tino pai mō te whenua. Mā rātou e āwhina ki te whai whakataunga kia tutuki ai ō koutou wawata, tae atu ki ngā mahi ngahere, ka mutu, kia tutuki ai ngā putanga ā-hapori, ā-taiao, ā-arumoni hoki.

Kōrero ki a Whenua Oho:

  • mō te whakamahi i te whenua
  • mō ngā arawātea ngahere
  • kia whai āwhina ki te whai whakataunga
  • ki te whai tahua.

Te Kooti Whenua Māori

Ko Te Kooti Whenua Māori he wānanga whakawā hei tuku ratonga kōti mā ngā kaitiaki whenua Māori. Ko tāna mahi he pupuri i ngā pūranga kōrero whenua, he tuku i ngā ratonga kōti mō ngā take whenua, he whakatau hoki i ngā whakamahinga nonoho whenua.

Kōrero ki a rātou mō te:

  • whakamahinga o te whenua i tēnei wā, āpōpō hoki
  • kaitiakitanga o te whenua
  • nonoho i te whenua
  • whakahaeretanga o te whenua
  • ratonga whakatau tohe whenua Māori.

He Rauemi Tiro ki ngā Whenua Māori

Mā tēnei rauemi mahere e āwhina ngā kaitiaki whenua Māori ki te kite i ngā āhuatanga kikokiko, ngā here, ngā pito mata hoki o tō koutou whenua Māori.

Te Pakihi Ahuwhenua Māori

Ko te whāinga o te tīma Pakihi Ahuwhenua Māori o Te Manatū Ahu Matua he mahi ki te taha o te Māori kia whakakorea ētahi o ngā wero onge ka tūpono ina whanakehia ai ā koutou huarawa rāngai mātāmua.

Te Tumu Paeroa

Ko tā Te Tumu Paeroa he mahi i ngā mahi whakahaere a te tarahiti Māori. Waihoki, kei te takiwā o te 1800 ngā tarahiti whenua Māori ka whakahaerehia e Te Tumu Paeroa. Tirohia tā rātou paetukutuku kia kite mehemea ka whakahaerehia e rātou tō koutou whenua.

Mehemea ka whakahaerehia tō koutou whenua e Te Tumu Paeroa, mā rātou koutou e āwhina
ki te rapu i te whakamahinga tino pai mō te whenua. Ko te momo āwhina, he tautohu whai wāhitanga, he whakamahere, he tautoko.

Ngā tūāoma ngahere

Inā te nui o te mahi hei whakariterite mō te kaupapa whakatō, te whakahaere hoki i te ngahere. He mōhiohio whakahirahira mō ia tūāoma kei te wāhanga Ngā tūāoma ngahere.

Te tīpako i ngā momo rākau e tika ana

I te whārangi He kupu āwhina ki te whakatō, ka whakamāramahia ki hea haere ai ki te whai āwhina tīpako momo rākau. Kua whakarārangihia ngā pakihi ka āwhina i ngā tāngata o Aotearoa i ā rātou kaupapa whakatō.

Tāne's Tree Trust

He aratohu ā-kaupapa tā Tāne’s Tree Trust mō te whakatō me te whakahaere rākau taketake. Kei a rātou hoki he whakaahua momo me ētahi atu pānuitanga mō ngā rākau taketake.

He mahi whai ake

Ka taea pea te whai tahua hei tīmata i tō kaupapa ngahere. Pānuihia ngā kōrero mō ngā momo tahua e taea ai.